ЧАҚМОҚ ФИКРЛАР...

                                     (кўнглимдан кечгани)

                               

- Охирги марта қайси бадиий асарни ўқидинг?

- Бадиий асарми? М-м-м-м-м... Эсимда йўқ!

- Кўрдингми, ўқимаслигинг хотирангни емира бошлабди...

        *  *  *

Онамни соғинганда қизимни қучаман "она-қизим" деб. Ҳудди онам уни "онажоним" деб суйгани каби...

                               *  *  *

НОДОНни у ёғидан ўқиб кўринг, бу ёғидан ўтиб кўринг, барибир, НОДОНлигича қолаверади.

                               *  *  * 

Эртага яхши инсон бўлиб уйғонмоқчимисиз? Унда бугун яхши одам бўлиб ухланг!

                                *  *  *

Энг чиройли таърифларни, энг гўзал ташбехларни айтаман кимларгадир бот-бот, такрор-такрор. Лекин мен чин дилдан яхши кўрадиган, муваффақиятларимдан фахрланиб юрадиган меҳрибон, содда сингилларимга "сени яхши кўраман, синглим" деб ҳеч айта олмайман, негадир...

                                *  *  * 

Мана, икки ой-ки, бир чиройли қизнинг ортидан чопаман-а. Ҳеч тутқич бергиси келмайди. Авваллари ҳеч бунақа ахволга тушмагандим. Лекин бу менга ёқаяпти. У ҳам дадасининг қувлашидан бир олам завқ олади...

                                 *  *  * 

У отдан тушди, бироқ эгардан тушгиси келмади. Билмайди-ки, эгар юрмайди..                             

                              

                                 *  *  *

Икки тоифа одам бор. Биринчисини кўришганда "Оббо, яна ўшами?" дейишади. Иккинчисини кўришганда эса "Оооо, бу Ўша-ку", дейишади.

                                 *  *  *

Ёмон одам ҳар доим ёмон бўлмаганидек, яхши одам ҳам доим яхши бўлмаслиги мумкин.

                                  

                                  *  *  *

Бахт қидириб топилганда эди, искович ит ЭНГ БАХТИЁР бўларди!